के तपाईँ कविता लेखनकाे प्रारम्भमा हुनुहुन्छ ? कविता लेख्दै हुनुहुन्छ ?

के तपाईँ कविता लेखनकाे प्रारम्भमा हुनुहुन्छ ? कविता लेख्दै हुनुहुन्छ ?
- कवि असीम सागर

१) याद गर्नूस् । कवितालाई सुन्दर बनाउने प्रयासमा अनावश्यक विम्बहरूको प्रयोगले सब्जीमा चिनी हालेको जस्तो नहोस् । कविता जसरी फुर्छ त्यसरी नै लेख्नूस् । बालुवामा फूल रोपेर पानी हालिरहनु मूर्खता सिवाय केही होइन ।

२) कविता लेख्दा म कसको कविता, कसका लागि र किन लेखिरहेकाे छु भन्ने कुरा बुझ्नसके कविता स्वत: राम्रो हुन्छ । फलामलाई जति पिट्यो त्यति धारिलो बन्छ । फलामलाई पिट्नु भनेको साधना गर्नु हो । धारिलो बन्नु भनेको निरन्तर साधनाबाट सफलता प्राप्त गर्नु हो ।

३) तपाईँ कुन सोच , परिवेश, परिस्थिति र कस्तो समाजबाट हुर्कनुभयो त्यो नै तपाईँको कविताको मूल विषय हो । तपाईँले त्यसबारे लेख्दिनँ भनेपनि नजानिँदो प्रकारले कवितामा आइहाल्छ नै । त्यसैले भनिन्छ , कविता सत्य हो । गरिब निमुखाहरूको आवाज हो । अँध्यारोमा रहेकाहरूका लागि उज्यालो हो । कविता कविको आत्मा हो ।

४) सुन्दर कविता मस्तिष्कबाट होइन आत्माबाट निस्कन्छ । कविता तपाईँको मस्तिष्कको सोच शक्तिलाई मापन गर्ने यन्त्र पनि हो ।

कवि असीम सागर

५) सुन्दर कविता लेख्नका लागि जीवनलाई कि घोटिन, चोइटिन , पिल्सिन दिनूस् , कि व्यापक अध्ययन गर्नूस् । राम्रा कविहरूका थुप्रैथुप्रै कविताहरू साथसाथै कवितासङ्ग्रहहरू पढ्नूस् । त्यही आधारमा नै कविता स्वत:स्फूर्त जन्मिन्छ । त्यही नै कविताको शक्ति हो । शक्ति भनेकै दर्शन र विचार हो भने सौन्दर्य भनेको कविताभित्रको कला हो तर साधनाविना विद्रोह , प्रेम र देशभक्ति दर्शाउँदैमा , वाहवाही पाउँदैमा कविता सुन्दर भयो भन्नुहुन्छ भने त्यो तपाईँको भ्रम हो ।

६) हुन त कविताबारे सबैका आआफ्नै धारणा हुन्छन् । कविता लेखिसकेपछि कमसेकम पाठकलाई यो मेरै कथा हो, याे मेरै कविता हाे भन्ने आभास कविताले गराउँन सक्नुपर्छ ।

७) असल कवि तथा लेखक बाँच्नका लागि होइन लेख्नका लागि बाँच्छन् ।

८) भर्याङ उक्लिसकेपछि भर्याङले टेकेको जमिन बिर्सन कविलाई शोभा दिँदैन ।

जय कविता ! जय साहित्य !!